「呢鑊杰！」早茶間，「晨雀」(early birds) 們各自埋首於報章中，突然傳來旁座口水周嗰把近乎男高音嘅呼叫聲，嚇到週遭啲亞嬸亞伯，有啲成副老花鏡跌咗落地，有啲成個人彈起，有嗰啱線吃緊雞包仔，連隨鯁親。一陣騷亂，須臾，幾十對眼同一時間，同一方向擰過嚟，啤住我哋張檯。咁橋，啱線我又八掛地四維望，眼神同佢地有所接觸，電光火石間，嗰啲凌厲、怨恨既眼光，一齊好自然咁集中掃過嚟我度，當正我就係嚇親佢哋嗰個。呢回眞係水洗嘟唔清。橫掂嘟食咗死貓，就好人做到底，咪當正自已係罪人，起勢同啲公公，嬸嬸「沙冧」。
「我就唔方唔杰咯！呢鑊！」我用對眼厲到口水周實一實，又責問：
「鬼整你呀！？」
「騎！騎！」口水周拗住個酸薑橋，好尷尬咁又話：「啱先攞你疊剪報，𥅈到呢單嘢，認眞唔講得少！」隨手遞過嚟俾我睇，狀甚無辜。
「睇過？」哦！原來係嗰單德國校園槍擊案。「唔使咁激吖？」我問。
「唔激就假！個世界立立亂，啲恐怖大新聞鑊鑊新鮮鑊鑊甘。睇怕冇耐亂到嚟香港咯！」口水周平日好樂觀，因乜今日咁杞人憂天？正想搭腔，佢又道：
「唔係咩？家陣經濟大通縮，又大失業，政府又大而無當，搞到成街黐線佬，實行有刀就亂砍，有槍就亂射。」聽落，口水周所言並非無因。
「咁又係！」我點頭稱是。
「講開又講，呢啲咁嘢又算唔算恐怖活動？你哋啲保險係咪冇得保？」吓？乜得口水周啲保險意識突然強得咁交關！
「哦！照睇槍擊案嗰個細路係神經失常導致嘅行為啫，唔算恐怖主義活動…」正想再詳細解釋，口水周立刻站亂歌柄，道：
「喂！揸支槍亂咁射，死傷咁多人，仲唔算恐怖，咁恐怖嘅事仲唔算恐怖活動？」口水周一輪咀。
(口水周咁解釋恐怖活動，夠竟啱唔啱呢？聰明嘅讀者，你哋梗知唔啱啦！不過，恐怖活動，又點解呢？聽日講。)
待 (續一)
|