(恐怖活動點解？咁又唔係三言兩語講得晒，各位都要俾啲心機睇埋本居士點搭口水周。)
「冇話過恐怖嘅事就叫恐怖活動嘅！保險講嘅恐怖活動，係指嗰啲為咗政治、宗教、意識形態之類嘅人，用暴力或威嚇手段，製造恐慌，以達到左右政府或公眾嘅目的。」我詳加說明。
「嘩！愈聽愈唔明喎！」口水周拗晒頭咁。
「簡單嚟講，即係睇行兇者嘅動機囉。好似呢單「畸屎」，嗰兇手好明顯就係黐線嘅，背後又證明唔到佢有乜政治、宗教、意識形態或相類嘅動機，咁咪唔算恐怖活動咯。掉頭講，以「九一一」事件為例，以民航機撞擊民居嘅行為，行兇者同埋背后策動嘅組織，都有明顯政治動機，咁就算係恐怖活動。」我進一步解釋。
「𠲖！咁即係話，如果有啲人宗教狂熱到發神經，好似嗰個日本眞理教咁，喺地鐵放毒氣害人，都算恐怖活動囉噃？」口水周又幾鬼精靈，一講就明。
「唉！講番轉頭你哋啲保險咪又係乜嘟唔賠！」口水周面口𢲡起晒。
「何解？」呢回，輪到我拗晒頭。
「居士，你諗吓，如果啲黐線佬，呢頭殺人放火，呢頭口喊打倒老懵懂，打倒煲呔曾，又或者話係上帝叫佢咁做，幫啲人快啲升天，咁你哋保險又當正佢哋有政治、宗教目的，定性為恐怖活動，講到底，又冇得賠！」口水周唔單衹識得舉一反三，仲一言九「頂」𠻹！
(口水周的確言之成理。咁講，保險公司咪好著數。遇啱啲咁嘢，話之係乜，一於當佢係恐怖活動，郁啲都唔賠錢，咁啲保户咪毫無保障！？)
待 (續二)
|